قصيدة زوجة لزوجها المسجون

قصيدة الزوجة :

شريت لي ثوب على شـان لقيـاك
........والثوب راحت موضته مالبستـه
وشريت عطر ما زهاني بليـاك
........أربع سنين بعلبته مـا لمستـه

رد الزوج :

دام الصبر يارب من اكرم عطاياك
...........يالله تعوضني بصبرٍ صبرته
حالي كساها هم عينٍ ترجاك
...........وانا عزيز الدمع طل ونهرته
حبيبي اقوى من هذولا وذولاك
...........داري بحبه ياعرب مانكرته
ماهمني سجني ولا خايف انساك
...........ولا خايفٍ حبك طويل وقصرته
اعرفك ياعمري من ادناك لقصاك
...........واعرف غلايه لو بقلبك سترته
الخوف كله من ظروفٍ تحداك
...........ناسٍ تلوك حلوقها اليا ذكرته
ناسٍ تبي فرقا عيوني وفرقاك
...........يالعنبوهم بالبشر ماخبرته
عذال قالوا طال سجنه بينساك
...........وحساد قالو ليا متى وهي مرته
لا لا يهمونك عديمين الإدراك
...........قولي وفا لي والشرف لنتظرته
حبيبتي يمكن تماديت لرضاك
...........لعيونك انتي كل دربٍ عبرته
تدري حبيبي وش حياتي بلياك
...........هم وضياع وقلب تاه ونحرته
تدري حبيبي وش حياتي بلياك
...........فكر وجنون وليل موحش سهرته
قولي امانه يامنى الروح لاجاك
...........ظلم الأوادم في عيالي قهرته
انا هنيا وكل كلي ترا هناك
...........يمك مسافر قبّله لا نظرته
انا وحيدٍ بين شبكٍ وشباك
...........ودامك معي مافيه شيٍ خسرته
باكر يلف الوقت وتلف دنياك
...........والغيب علمه عند ربٍ شكرته
باكر قريب اجيك واسعد محياك
...........واللي مضى لي من عذاب اختصرته
دامٍ صبرنا وتالي الصبر لقياك
...........الله كريم يرد صبرٍ صبرته